monumenta.ch > Hieronymus > sectio > sectio 20 > csg456.30 > II. FORMULA PATRICIATUS. (511) > sectio 29 > csg456.78 > sectio 6 > csg456.13 > csg48.203 > sectio 3 > sectio 39 > sectio 10 > XVIIII. MAXIMO VICARIO URBIS ROMAE SENATOR P̅P̅O̅. (a 535/536)
Cassiodorus, Variae, LIBER DUODECIMUS, , XVIII. CONSTANTINIANO VIRO EXPERIENTISSIMO SENATOR P̅P̅O̅. <<< >>> XX. THOMATI ET PETRO V̅V̅· C̅C̅· ARCARIIS SENATOR P̅P̅O̅. (a 536)
Cassiodorus, Variae, LIBER DUODECIMUS, XVIIII. MAXIMO VICARIO URBIS ROMAE SENATOR P̅P̅O̅. (a 535/536)
1 Adventum quidem regium ex ipsa potestis cognoscere frequentia commeantum, quia necesse est ut res magna competentia praemittat semper indicia.2 venturum diem Lucifer demonstrat exortus: serena secutura favens ventus ostendit: imminentia bona quadam animi praesagatione dinoscimus et difficile magna res geritur, quae signorum praecursione minime declaretur.3 Verumtamen et nos necessario commonemus, ut pontis iunctione Tiberinos fluctus sollemniter vestiatis, quatenus transitum praebeat intremulum fixum concatenatione navigium et de suo situ celerem nobis praestet excursum.4 non moveatur pigris funibus, ut solebat: non manibus trahentium moles tanta torpescat: celeritatem potius fixa conferat, quam se movens antea non praebebat.5 ambulent commeantium greges profecto, non navigent: incisa nos unda deportet.6 sic decet dominum suscipi, ut aliqua debeat novitate gratulari.7 Tabularum fortiter iunctura constricta soliditatem debet praebere necessariam, ut pavorem undas dubitantium terrena similitudine possit auferre.8 optetur quin immo longior fuisse, cum transitur innocue.9 cancellorum tutamen dextra laevaque decenter aptetur: prosper datur transitus, cum fuerit casus asper exclusus.10 vide quemadmodum reliqua ad te pertinentia praepares, qui te occursurum esse cognoscis.11 quale est enim in tanta frequentia non potuisse culpari! universos affligit, qui regi aliquid necessarium subtrahit, quia, dum laetus optatur ab omnibus, cunctos contristat, si probetur offensus.12 Adde quod sic praeclarum est sub tanta senatorum occursione laudari, principem sic suscipere, ut omnes intellegant nil deesse, ante ipsum quoque dominum venire laetum quam aliqua trepidatione confusum.13 insperatum bonum est, si is ad quem deceptionis pertinet periculum sibi gratiae procuret augmentum.14 in quam rem illum sedis nostrae militem nos direxisse cognosce, qui tibi officioque tuo debeat imminere, quatenus nobis omnia parata renuntiet, quia committi non potest casui, quod nostro periculo constat adscribi.
Cassiodorus HOME